I Timôthê 2:1-7 

“Đei minh ‘nu Kră Yang ‘Bok Kei-Dei păng đei minh ‘nu pơm ‘long sơlam đĕch anhăk kon bơngai ala teh wă kơ bơngai ala teh hiôk hăm ‘Bok Kei-Dei. Bơngai mă pơm ‘long sơlam ei anăn Sư Yêsu Krist.”

(I Timôthê 2:5)

Nơ̆r jet tơchĕng pơwao:

–  Đơ̆ng rŏng kơ bơtho athei krao khan kơdih păng krao khan tơplih kơ bơngai nai hăm lu bơngai pơgơ̆r, ‘bok Pôl bơtho pơtrơp tơdrong kiơ?

–  Yua kơ kiơ ‘bok Pôl bơtho pran kơ tơdrong đei minh ‘Bok Kei-Dei đĕch hăm minh ‘nu bơngai sơlam đĕch kơ kon bơngai hăm ‘Bok Kei-Dei?

–  Lu bơ̆n kăl kơ tơgŭm bơngai ưh tim mă lui kơ Kră Yang wă kơ lu sư hlôh băt hơđăl lăm tơdrong kiơ?

      Đơ̆ng rŏng kơ bơtho lăm tơdrong krao khan, krao apinh, krao khan tơplih kơ đĭ đăng kon bơngai hăm lu bơngai pơgơ̆r, ‘bok Pôl tơbăt ăn tơdrong ‘Bok Kei-Dei wă kơ đĭ đăng kon bơngai gơh klaih păng hlôh băt tơdrong tơpăt sĭt. Lu kon ‘Bok Kei-Dei kăl kơ hiơ̆k bơngơ̆t kơ tơdrong krao khan tang ăn kơ lu bơngai ưh tim mă klaih đơ̆ng tơdrong yoch yua kơ tơdrong noh trŏ thoi Kră Yang wă lăp đon, pha ra kơ noh dơ̆ng Kră Yang wă kơ đĭ đăng kon bơngai “hlôh băt tơdrong tơpăt sĭt” wă kơ đei jơhngơ̆m rơmuŏn sơng iŏk tơdrong dŏng pơ-klaih đơ̆ng Kră Yang song ăn (trong 1-4).

      Đơ̆ng rŏng kơ pơm yoch, kon bơngai bơ̆n đei chă đon wă kơ kuh kơ lơ yang nai wă ba ăn tơdrong dŏng pơ-klaih, mă lei Nơ̆r ‘Bok Kei-Dei khan hơđăl “đei minh ‘Bok Kei-Dei đĕch, păng đei minh ‘nu pơm ‘long sơlam kơ ‘Bok Kei-Dei hăm kon bơngai, wă khan Kră Yang Yêsu Krist, sư jing kon bơngai” (trong 5). ‘Bok Pêtrôs kŭm đei pơma ‘bơ̆t anăp lu ‘bok Sek tơlang tơdrong juăt lu bơngai Juđê thoi âu: “’Pă đei bu nai dơ̆ng gơh pơklaih bơ̆n đơ̆ng tơdrong yoch. ‘Bok Kei-Dei ăn Kon pôm Sư Yêsu Krist đĕch wă pơklaih bơ̆n.” (Tơdrong Jang 4:12 ). Kŭm thoi noh mơ̆n, đei minh ‘nu pơm ‘long sơlam kơ kon bơngai bơ̆n hăm ‘Bok Kei-Dei noh jơ̆ Kră Yang Yêsu Krist. Nơ̆r “Long SơLam” wă khan bơngai hơmet tơdrong wă pơhiôk ‘bar pang. Kon bơngai pơ̆k huŏng na tơdrong yoch pơgăn kon bơngai hăm ‘Bok Kei-Dei. Kră Yang Yêsu jơ̆ ‘Bok Kei-Dei jur jing bơngai, Sư kon bơngai mă lei Sư kŭm ‘Bok Kei-Dei thoi noh minh ‘nu Kră Yang Yêsu đĕch gơh pơm ‘long Sơlam kơ kon bơngai hăm ‘Bok Kei-Dei đơ̆ng tơdrong Sư lôch tang tơ’long pơglang dŏng pơklaih kon bơngai đơ̆ng tơdrong yoch.

      Đơ̆ng sơ̆, Kră Yang yua ‘‘Bok Pôl pơm “thây bơtho, pơm jơ̆ng ‘bang păng pơm ‘‘Bok bơtho” wă ră roi đon lui păng tơdrong tơpă sĭt dŏng pơklaih kơ lu bơngai nguaih kơ bơngai Israel (trong 7). Dang ei, rim ‘nu kơ bơ̆n ‘Bok Kei-Dei đei krao wă ră roi ăn kơ lu bơngai oei hiong răm lăm teh đak (Mathiơ 28:19-20, Markôs 16:15 ). Lu bơ̆n kăl kơ “… athei iĕm krao khan bơnê kơ ‘Bok Kei-Dei ling-lang apinh Sư dŏng mơnat đĭ-đăng bơngai păng đĭ-đăng ‘bok pơtao păng đĭ-đăng kră pơgơ̆r wă kơ bơ̆n oei hiôk-hian păng đei đon tơpăt kiơ̆ tơdrong ‘Bok Kei-Dei.” (trong 1-2). Hơdai tơdrong noh bơ̆n kăl kơ tơgŭm đĭ đăng bơngai băt kơ dan đon lui lu sư lăm minh ‘Bok Kei-Dei đĕch, hăm hơdai hlôh băt tơdrong dang đon lui lăm minh ‘‘Bok Dŏng Pơklaih đĕch noh jơ̆ Kră Yang Yêsu Krist. Minh Sư đĕch jơ̆ ‘long sơlam tuh pham huai iŏk tơdrong yoch kon bơngai bơ̆n. Tơdah minh ‘nu bơngai lui kiơ̆ kơ tơdrong mơn ‘maih bơ̆t anih ayơ đĕch lei ưh kơ đei kơjăp ‘lơ̆ng. Kăl kơ năm tơ Kră Yang hăm đon lui lăm tơdrong hlôh băt mă hơđăl lei na gô kơjăp ‘lơ̆ng hăm Kră Yang hăm Khŭl Bơngai Lui, păng đon lui noh net net kơnh gô wơ̆ tŏk.

Ơ Kră Yang, apinh mơnat kơ inh yua kơ inh ưh tam mă đĭ jơhngơ̆m pơm kơdranh kơ Ih păng đei tơdrong roi ưh kơ tôm tơdrong tơpăt sĭt ăn kơ bơngai ưh tam mă lui. Apinh Ih tơgŭm inh đĭ jơhngơ̆m krao khan păng ră roi tơdrong tơpăt sĭt gah tơdrong dŏng pơklaih mă rơđah hơđăl, tôm mah. Yua anăn Kră Yang Yêsu Krist. Amen

Lu bơ̆n hăm đei tơgŭm lu bơngai ưh tam mă băt tơdrong tơpăt sĭt hăm tơdrong lui trŏ tơpă ưh?

Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Jêrêmi 41

Kênh Youtube BHKTHN:

https://www.youtube.com/c/bhkthn

The post Đon Lui păng Hlôh Băt Tơdrong Tơpăt Sĭt – 22/11/2025 appeared first on Hội Thánh Tin Lành Việt Nam.